د اوکراین جګړه؛ د کییف پر وړاندې د روسیې د بریدونو د نوې څپې ادعاوې
احساس نیوز || یکشنبه|| ٨ وږی ١٤۰۵ھ۔ش
د لوېدیځو رسنیو د راپورونو له مخې، روسي ځواکونو له شاوخوا ۸۰ ساعتونو راهیسې د اوکراین پر بېلابېلو سیمو د ځمکنیو او هوايي بریدونو لړۍ روانه ساتلې ده.
راپورونه وايي، د روسیې د بریدونو تمرکز تر ډېره د اوکراین په پلازمېنه کییف کې د وسلو پر زېرمتونونو او پوځي مرکزونو دی. ادعا کېږي چې ځینې دغه مرکزونه د ملکي استوګنې سیمو ته نږدې جوړ شوي، چې د بریدونو پر مهال د ملکي تلفاتو د زیاتېدو اندېښنې یې راپورته کړې دي.
د سرچینو په وینا، په یوه تازه برید کې د وسلو پر یوه زېرمتون د برید له امله ۳۷ کسان وژل شوي، خو د دې شمېرې خپلواکه تایید لا نه دی شوی.
بلخوا، راپورونه وايي چې د خوراکي توکو پر ځینو زېرمتونونو او د اوکراین د اکمالاتي لارو د زیانمنېدو له امله په ځینو سیمو کې د خوراکي توکو د کمښت اندېښنې زیاتې شوې دي.
په همدې حال کې، «اکسیوس» راپور ورکړی چې امریکا هڅه کوي د ډونالډ ټرمپ، ولادیمیر پوتین او ولودیمیر زلینسکي ترمنځ د یوې عاجلې ناستې زمینه برابره کړي؛ خو د دې احتمالي ناستې په اړه نور جزئیات نه دي خپاره شوي.
ځینې روسي رسنۍ بیا ادعا کوي چې پوتین خپلو ځواکونو ته د اوسنیو بریدونو تر څنګ د لا پراخو او سختو پوځي عملیاتو د چمتووالي امر کړی دی.
په ټولنیزو رسنیو کې داسې ادعاوې هم خپرې شوې چې ګواکې روسیه غواړي د اوکراین پر وړاندې د ۵۰۰ زرو څخه تر ۶۰۰ زرو پورې ځواکونه ولېږي او د اوکراین له شمال څخه د کییف او چرنیهیف پر لور نوې جبهې پرانیزي؛ خو تر اوسه د دغو ادعاوو لپاره رسمي او خپلواک تایید نه دی وړاندې شوی.
