امریکا سوریه د «ترهګرۍ ملاتړو هېوادونو» له نوملړه وایستله

احساس نیوز || سه شنبه|| ٠٣ وږی ١٤۰۵ھ۔ش
د امریکا د بهرنیو چارو وزارت د دوشنبې په ورځ په رسمي ډول سوریه د «ترهګرۍ د ملاتړو هېوادونو» له نوملړه وایسته؛ هغه اقدام چې د سوریې لپاره د واشنګټن د بندیزونو د کمولو او له دمشق سره د اړیکو د نوي پړاو د پیل په لړ کې مهم ګام بلل کېږي.

د امریکا د بهرنیو چارو وزیر مارکو روبیو ویلي، د سوریې د نوملړ څخه د ایستلو پرېکړه د کانګرس د ۴۵ ورځني قانوني بیاکتنې له مودې وروسته رسمي شوې ده. نوموړي دا اقدام د سوریې خلکو ته د اقتصادي پرمختګ او هوساینې د فرصت برابرولو په موخه د ولسمشر ډونالډ ټرمپ د تګلارې یوه مهمه برخه بللې ده.

د امریکا د خزانې وزارت هم ویلي چې سوریه نور د هغو ځانګړو بندیزونو تابع نه ده چې د «ترهګرۍ ملاتړو هېوادونو» پر نوملړ له شاملېدو سره تړاو لري. دغه بدلون د سوریې پر نړیوالو مالي راکړو ورکړو، پانګونې او اقتصادي اړیکو د پخوانیو محدودیتونو د کمېدو زمینه برابروي.

د امریکا د دې پرېکړې تر څنګ، واشنګټن د «النصره جبهې» یا «هیئت تحریر الشام» د ځانګړي نړیوال ترهګر سازمان په توګه نومول هم لغوه کړي او د امریکا د بندیزونو له اړوندو نوملړونو یې ایستلی دی.

سوریه له ۱۹۷۹ کال راهیسې د امریکا د «ترهګرۍ د ملاتړو هېوادونو» په نوملړ کې وه؛ له همدې امله د دې نوملړ څخه ایستل د دمشق لپاره له اوږدې نړیوالې انزوا وروسته یو مهم سیاسي او اقتصادي بدلون ګڼل کېږي. د امریکا د چارواکو په باور، د بندیزونو کمېدل کولی شي په سوریه کې د بهرنیو پانګونو، سوداګرۍ او بیارغونې لپاره زمینه پراخه کړي.

د سوریې لپاره د امریکا ځانګړي استازي ټام بارک د دې پرېکړې هرکلی کړی او ویلي یې دي چې سوریه له انزوا څخه د مشارکت پر لور د تګ په حال کې ده. هغه دغه اقدام د سوریې د اوږدمهاله سولې، امنیت، اقتصادي بیارغونې او له نړیوالې ټولنې سره د اړیکو د پراخېدو لپاره مهم پړاو بللی دی.

د واشنګټن وروستی اقدام داسې مهال ترسره کېږي چې د ټرمپ اداره هڅه کوي له دمشق سره اړیکې پراخې کړي او سوریې ته د اقتصادي بیا رغونې او نړیوال ادغام لپاره نوې زمینه برابره کړي. د امریکا چارواکي تمه لري چې د بندیزونو د کمېدو په پایله کې به نړیوالې سوداګرۍ او پانګونې ته د سوریې د اقتصاد د بېرته نښلېدو امکانات زیات شي.

د سوریې حکومت هم د امریکا د پرېکړې هرکلی کړی او دا یې د هېواد د سیاسي بدلون او له نړیوالې ټولنې سره د نویو اړیکو د رامنځته کېدو مهمه پایله بللې ده.