سيمه او نړۍ
ايران: هليکوپتر لوېدو پېښه کې نهه تنه وژل شوي
ايراني رسنيو خبر ورکړی، چې د سره صليب اړوند د يوه هليکوپتر لوېدو پېښه کې نهه تنه وژل شوي دي.
پېښه تېره شپه شاوخوا اته نيمې بجې هغه مهال رامنځته شوه، چې هليکوپتر د يوه ناروغ د لېږد په پار له خنج سيمې د شيراز پر لور روانه وه، چې راوغورځېده.
د ايران د مرستې او ژغورنې ادراې وياند مصطفی مرتضوي رسنيو ته ويلي، د هليکوپتر لوېدو له امله ټول نهه تنه سپاره وژل شوي، چې د هليکوپتر عمله، ناروغ او له ناروغ سره مله کسان په کې دي.
نوموړي زياته کړې ده، تر دې دمه د اتو تنو وژل شويو جسدونه پېژندل شوي دي خو يو تن لا هم ورک دی، چې مرستندويه ډلې يې په لټون بوختې دي.
