روسیې پر اوکراین درانه بریدونه کړي؛ نوې شمالي کوریايي توغندي هم ورسره دي
احساس نیوز || جمعه مبارک|| ٣٠ زمری ١٤۰۵ھ۔ش
روسیې پر اوکراین درانه بریدونه کړي؛ نوې شمالي کوریايي توغندي هم ورسره دي
روسیې تېره شپه ناوخته پر اوکراین پراخ او درانه توغندیز او ډرون بریدونه کړي دي. د راپورونو له مخې، په بریدونو کې پوځي تاسیسات، صنعتي مرکزونه، عامه زیربناوې او نور مهم ځایونه په نښه شوي دي.
د اوکرایني چارواکو په وینا، په دې پراخو بریدونو کې ګڼ شمېر توغندي او بېپیلوټه الوتکې کارول شوې دي او په کیف او شاوخوا سیمو کې درانه زیانونه او مرګژوبله اوښتې ده.
بل لور ته، روسي او اوکرایني سرچینې راپور ورکوي چې روسیې له شمالي کوریا څخه د KN-30 په نوم د بالستیک توغندیو نوې او درنه بڼه ترلاسه کړې ده. د شمالي کوریا په ادعاوو کې ویل شوي چې دغه توغندی د تر ۲.۵ ټنه وزن لرونکې سرګلولې د لېږد وړتیا لري.
د اوکراین د استخباراتو په وینا، روسیه د شمالي کوریا د بالستیک توغندیو د کارولو وړتیا لا پراخوي، چې د اوکراین لپاره د هوايي دفاع په برخه کې نوی ګواښ بلل کېږي.
د دغو درنو بریدونو له امله یو ځل بیا د اوکراین د هوايي دفاع د کمښت موضوع مطرح شوې ده، او د کیف چارواکو له لویدیځو هېوادونو د لا زیاتو دفاعي سیستمونو غوښتنه کړې ده.
