له پرون راهیسې د ننگرهار برېښنا پرې ده، د ننگرهار د برېښنا شرکت د مشر په وینا د ننگرهار د برېښنا مزي په پادپخ کې د جگړهمارو له لوري پرې شوي دي.
د ننگرهار د برېښنا شرکت مشر وحیدالله پوپلزي رسنیو ته ویلي چې زموږ تخنیکي ټيم چې د پرې شوي مزي سیمې ته ولاړ شي د جگړهمارو له لوري پرې ډزې کېږي او په دې نه توانېږي چې مزي جوړ کړي.
پوپلزی زیاته کړې چې د قومي مشرانو او سپینگیرو په منځگړیتوب له جگړهمارو سره خبرې روانې دي که چېرې خبرې نتیجې ته ورسېږي نو ښايي چې نن مزي جوړ شي.
د لغمان ولایت ویاند رسنیو سره د مزي د پرې کېدو خبره منلې او زیاته کړې یې ده چې مزي په دوو برخو کې پرې شوې ده.
